ZOMI TE MIMAL MUHNA IN BUAINA SIATNA HONG TUN

(ZOGAM CHARTER ZPCC/ZRAEC)

(ZBC NEWS correspondent, Sia Pian Khual)
Khua’hun luanzia tawh Zomite’ minam ding mun ki-et ciangin Zomite’ khantohna taktak pen facebook din mun ciangah hong ki lang khia mahmah ahihna din mun ciang kiseh theih phot ahihna kimu thei hi. Myanmar gambuaina thuneihna hong kiluah ciangin kum 2021 tungsiah lamah gampi suahtak nadingin hong kipan khia khangno ten apian ma minam leh gam sungah suahtakna bang ci bangin kisem ngei khin hiam cih pen tangthu a kan cian loh manin pawl khat amau leh amau kisiat lawh hong suak hi.

Tu’ hun ciangin Zomite’ adingin minam khat ki makaihna taktak sungah kasuan thei nai loin mipi suahtakna khawng ki lim gen mahmah bilbel uhhi. Zomi thugen thei khempeuhin kilemna leh kithu tuah nading lim gengen ciat sam a, koiah munah ki thutuahna om a, koi munah kilem tawnin Zomite kipum khat ding cih pen a thutaktak gen khiat theihna nei kuamah om lo hi. A taangpi inah kilem ding gen, minam vai kisem ciat, thautawi nuam zong om kawikawi, gambup kikhelna leh ki thutuahna lampi taktak kitel zo nailo ahih manin tua in mimal muhna ciang tawh thugenna leh deihna khat peuhah thapiakna ki neih lawh suak uhhi.

Zogam Charter thukimna a nei tengin pom nawn loin nawl khin uh a, tua te in mipi suahtakna hong ci kik to leuleu ahih manin uang tatna hong lian hi. Zogam Charter a pom te sungah Zogam Declaration tawh kalsuan theihna lungsim nei loin mimal deihna lam siksan in nasem nuam ki-om leuleu uhhi. Myanmar in suahtakna taktak ngah nadingin mualtung mite deihna khempeuh kipawl khin sa ahih manin tua sungah Myanmar in mipi deih suahtakna bukim kinei kimtek ahihi. Malaysia Zomi Khawmpi panin hong kipan khia makai thupi tengleh Pasian nasem te in thupha a piak Zomite’ mai lam maban ding thukimna thute nawl khin leh pom na pin a zui siam loin ki thehthang khempeuh mimal buaina leh lawh sapna lamah ham siatna hong tuak toto uh cih pen kimu thei hi.

Pasian in sum leh pai bei-in Zomite’ ading tu’ hun suahtakna deih a diang khengkhang te a kipan leh minam vei kisa in makai hawm thawh te’ gel ma hunin tu’ ni a makai Zomte ading ZPCC/ZRAEC in kum 2019 kumin hi bangin hun manpha leh sum leh pai tampi bei-in Pasian tungah khaici a tuhna pen a gah lawh dan hong ki bang lo ding ahihna Zomte sungah kimu toto suak ci hi. Zogam Charter thukimna letmat a thuh ten pom loin gambup suahtakna i cih kik bilbel zong ngaihsut huai thu khat suak hi. Zogam Charter tawh kalsuanna sangin mimal deihna tawh ki pawl bawlna pen mimal kisiatna leh kimuh dahna hong ki lang kik zel hi.

Mual tung mite deihna in tu’ ni a a diang khengkhang leh ZPCC/ZRAEC makai te” minam vai hawmna a hawmthawh tengin thu man tawh kisepna pelh bawlin a hoih zaw ding bangin thu gen ciat mahleh tu’ ni ciangin Myanmar buaina pen mi pawl khat sihna leh khut khelhna mawh puak ding kibeh lapna din mun kisuak ahihi. Zomi khempeuh sungah kilemna leh minam vai-ah daihna leh lawh cinna pen a lampi ki tawn lo ahih manin tua lampi-in Malaysia Zomi Khawmpi 2019 tungah hong kinga hi. ZIUSA inn tekna leh Malaysia Zomite hanciamna te Pasian thukim pih keileh tu’ ni ZPCC/ZRAEC din mun pen gen ding om lo din mun ahihi. Pasian in thukim leh phasa ahihna hangin Zomi Political Coordination Council ZPCC hong phut khia thei a, tua zui-in Zogam Charter hong tangko khia , hih te khempeuh Pasian phalna om loin kisem thei lo ding thute uh ahihi.

Myanmar leh Zogam sungah bang zahin minam vaileh gamvai ah ki diang zongin minam vai thupha gui pen Pasian in a tuam in a koih ahih manin sem taleh sem ta keileh Pasian in tua pen mah na phungvuh zaw den hi. Zomite’ tu’ ni ciang mimal muhna leh buaina te hih bangin hong pian theihna hangin Zogam Charter panin pial khia te leh a pom nuam lo te’ kikal ah buaina hong lian mahmah ta hi. Myanmar gam sungah mipi deihna om theih nadingin hih Zogam Charter ahih lam phawk kha loin gambup ciang a gen pah zong ki-om hi. Zogam Charter sungah minam khat hi hang tua ahih manin galkap khat hi hang, cihte a pom thei lo peuh mahin mimal metna leh deihna lampi a zong uh ahihna kitel zaw ci hi.

Zogam Charter panin Zomte i pial ciangin buaina hong tamin minam vai a thei nuam leh a gen nuam kitam mahmah ta uhhi. Hih makai ten kum 2019 buai ma pekin Zomite’ mai lam ding na mu khin ahihna phawk leng tu’ ni a minam vei khat peuh ading siatna om lo ding hi. Zomite pen siksan leh bylaw thukhun tawh ki -ukna pen zuih siam loin zong kitel khin lo din mun ahihi. Federal Democracy gamah zuih ding thu bek om a, a zui lo peuh mah suahtakna hi, ci-in kikhah khong tuan loin a zuih loh manin thuhilhna kithuak sak hi. Mipi deihna suahtakna pen ZPCC/ZRAEC kalsuanna leh ki vai puakna sungah Zogam charter sungah kim ahih lam pen minam vai sem nuam leh avei khatin thei mahmah ding uhhi.

Zomite’ koi mah peuh kitel khelhna om loh nadingin hanciam in minam vai leh gamvai ah asem leh agen nuam ten Zogam Charter pen siksan in mipi tungah thugen ding mah thupi penpen hi. Mimal deihna gen sangin Zomite kipumkhatna ding taktak Zomi Political Coordination Council ZPCC/ZRAEC in hih Malaysia Zomi Khawmpi 2019 thukimna te na hing sak ahih manin thupha kiizom suak hi. Zomite pen kipawlna hong tam semsem na hangin thukhun nuaiah kuamah om nuam loin mimal deihna tetawh thugen in nasepna te hangin kipawlna ki beh lap hi. Biakna sungah sia om khit ciangin pawlpi bylaw zuih sangin pawlpi dang phuan khia in ama deihna suahtakna tawh sia sem nuam vive te dan ahihi.

Zomite” kilem nading leh Zomite’ minam vai thute leh Zomi Revolutionary Army Eastern Command ZRAEC din mun a kipan Zomite’n thum mawk gengen nawn loin Zogam Charter panin ki thutuahna lamah hilh cianna leh kipumkhatna thu siksan huai hi. Online tungah siksan nei loin mimal deihna teng kigen kigen in ki kawkkawk sangin Zogam Charter kheng valin gamtatna leh na sep nopna in kikhenna asuak sak hizaw hi. Bang zahin mipi deihna leh suahtakna i sem zongin Zomite’ deihna kihel loin suahtakna piang thei tuan lo ding uhhi. Mual tung mite deihna te kim loin Democracy kingah nading lampi om ngei lo ahih manin mai ah pai masa leh luangkham in sihna maiah minam nasem ten Penlong nungta sak ding cih Kawl kumpi tungah a pulak denna pen mipi deih suahtakna ahihi.

Penlong hing sak in tua thute kizang henla mipi ki makaih ding pen tu’ ni a kum 2021 cianga thautawi kua mi khat peuh ngaihsutna bulpi pen in Penlongah om khinta hi. Zomite’ siatna leh minam sungah daihna om nading Malaysia Zomi Khawmpi thukimna pen Pasian kipsak leh mipi te thukimna ahih manin a pom kim dingin han ciam ni’ a pom nuam lote leh agensia a kawk sia mite peuh mahin ham siatna thuak ding uh hi. Pasian in hong thukim pih keileh hih hong piang lo ding a, bangzah in kigel zongin Pasian phalna om loin na bang mah kisem thei lo hi. Pasian in phal peuh leh kuamah khaktan theih luat om lo h, tua ahih manin Zomi State cih bangin online tungah kazak ciangin ka lawp a, tha ka ngah hi. Upna nei-in thasan in minam makai te panpih ni’ i gam sungah CNA peuh thuneihna leh vai hawmna peuh om sangin Zomite’ deihna i ngah pah kei zongin ZPCC/ZRAEC pen phungvuh lel ding hi.

Falam leh Khalkha te bangin kuamah dang hong theih pih loin tu’ ni a i makai ZPCC/ZRAEC kalsuanna pen amau sungah a genteh den khat uh ahihi. Zogam Charter pen a nei masa pen kisuak a hi bangin kal masa ah Zomite muhna te nam dangten hong etteh khat suak hi. Ei sungah zuih siam leh panpih siam ki tam loh hangin Zogam kiphuh nadingin ka gen mah bangin Pasian thupha pia ahih manin kilawm leh kituak a, hun a sak ciangin zong Zomite’ minam khawmpi kibawl kik hun hong om ding hi. Gal leh sa kineihna pen huang pua panin minam vai sem nuamte,. Zogam Charter nawlkhin ahih keileh siksan nuam loin mimal deihna tawh thu vai hawm mengmeng cih te in minam leh mimal kikal ah siatna leh hamciatna hong tun ahihi. Ka lungdam kei mimal muhna leh Zomite’ maban kilemna taktak thu ka muh dan ZBC News tungah huhna ngenin kong hawm khia hi.Sia Pian Khual, Zogam vangin!

Read more news
http://www.zbc.news

correspondent#khaitawng#zogam

everyonesharelike