Gam leh Minam ading koici ngaihsut huai

Gam leh Minam galdo ihcih in a kizangsa ki uk na, kalsuan na te hangin Minam leh gam adingin deihloh na hang leh Gamsung minamsung hubit nopna tawh gam leh Minam adingin a hoihzaw mipi santheih kiuk na deihna hangin hongpiang a hihi.

Minam leh gam adingin galdo ihcih in hong uk kumpi langpan na bek hilo a, gam ki uk-na, dan leh phung a kipan Mipi omzia khawlzia te a thak in puahnop nazong a hihi.

Myanmar buaina sungah ukna buluh te khutsung pan in, uk-na ngah NLD in hongngah kik nading deihna tawh NLD pan in CRPH hong kipankhia a, kumpi kalsuan ziatawh kalsuan theih nadingin NUG cih kiphut in a galkap dingin PDF cih ahihi.

Hih buaina hongpian mapek in Muangtung mi Hiamtawi ten kum 70 bang Federal Democracy deih in ki peipei khin taleh Kawl te in tu nidong hongpia nuamlo uhhi. Mualtung mite tawh suahtak na a lakhawm kawlten Myanmar gamsungah thuneih na leh hamphat nateng lakhin uh a, tudong mah akhah nuamlo uh cih pen mikim in ihtheih sa a hihi.

Tua ban ah Minam ki deidan na, te hongkhang semsem in, kawl ngeina kawl biakna te Myanmar gambup zuihdingin damdam in hong thunlut uh a, Zomi te sungah zong Zomi a hihna a zumpih Zomi tampi ki om ta hi.

Tua bang kawmkal ah Chin State sungah Zomi leh Zogam sung hong uk cipnuam CNF/A hong omciangin tuate dal nadingin leh Zogam kembit zawh nadingin ZPCC/ZRAEC hongpiang a hihi. ZPCC/ZRAEC in Zogam bit  nadingin Zomi State a hih kei leh Ei ma thuneih na gam ihsuah nadingin Myanmar gam thunei te kiangah deihna ki.pulak a hihi.

NUG hong omma pek a kipan a kisemkhin hi a, a hizongin kua mahtawh kisialo in, thutawh kalsuanding lunggulh na tawh kikap na cihte omlo in kikal suan toto hi. A hizongin 2021 ukna buluh khit ciangin NUG muan natawh CNF/A leh a nungzui tengin Zogam sungom ZRAEC camp te hongsim na pan in tu nidong kikap na hongpiang a hihi.

ZRAEC in migam mi leitang tungah a vakap a vado hilo in, Zogam sungah thuneihna hong lanuam CNF/A te a ki hawlkhia a hihi. Hih galte hawlkhiat na-ah kuakua a hizongin hong panpih nuam leh hong huhnuam khempeuh kisangding hi cih ZPCC/ZRAEC in thusuah hongbawl uhhi.

Hih bangin ih gam ih leitang tungah hongbuaisak hong ukcip nuam te hawlkhak theih dan lampi hangin Galkap kumpi tawh a kihawlkha khawm hi a, kipawlna leh thukim na cih bang om hilo hi. 

Leitungbup Zomi te deihna thukim na 2019 kum a, thukhensat na te, ZPCC/ZRAEC in a kizom toto, a kisem toto hi a, lawhcin na ih ngahdongin a ki khawllo ding Zomi te maban a hihi. Hun lui sungah CNF/A te holhtuah na hangin Zomi sung kibuai na hong om hangin Hunthak sungah kipuah na thutheihna in ihzat siamding kisam mahmah hi.

Hih bang kithutuah lohna te hangin Zomi sungah tualgal tuamtuam hong kithah na fuamtuam tampi Zomi ten ihtuak ngeikhin hi. Tangthu pen theihding hi a, thukkikna dingin zanglo in kiphuahphat nadingin tangthu ihtheihding kisam mahmah hi. Zomi te in Zogam sungah thuneih na te nei-in namdang te khutsung ah ih omkhak loh nading deihna bulpi tawh Zogam kembit hubit ding cih a hihi.

Zomi a kua mapeuh in a theihhuai ah Minam leh gam adingin ih ki thutuak ding kisam masa hi. Tua khit ciangin Minam galkap te nek leh dawnding zatding van a kipan a kisam tuamtuam te Mipi ten ih hanciam ding kisam hi. Thu leh la tuamtuam hongvan dingin makai zong ih kiseh kul a, A nu Apa numei naupang a kua mapeuh in ih sepkhop ding a hihi.

Minam vai cih pen a bei theilo nasep na hi a, ihdeih ih ngahzongin Minam khantoh nading sepding nam tampi om veve lai hi. Upna muhna sandan a tuamtuam tezong khat leh khat kizahtak siam in, sepna bawl na te ah khutkhat tawi khekhat khai bangin semkhawm in, Ngahding a kilawm na te ahzong taangtang phemhawm bangin hawmsiam dingzong kisam mahmah hi.

Gam leh minam vai ah, Makai te a thupi mah bangin Nungzui tezong thupi mahmah hi. Nungzui te in a thu a la ih van theihloh hangin zuihna,sepna, piakna, theihsak na, te a kipan panpihding huhding pen Nungzui te mawhpuak a hihi. Tua mah bangin Makai tezong Mipi mai ah dinngam ding kisam mahmah hi.

Maikai te in ih mabang ih tuona banghiam? koici kalsuanding cih a kipan mipi maiah genngam in hongsepngam dingpen a kisam pen hizel hi. Koimun koimun ah a dingngam makai kisam a, koimun koimuh ah a zuingam nungzui zong a kisam a hihi.

Makai bektawh mual kisuak zolo a, Nungzui bektawhzong mual kisuak zolo hi. Makai a om mahbangin nungzui zong a koimunkim ah kisam a, Nungzui a om mahbangin A koi munkim ah Makai omlo in mittawh tawh kibang hi. Makai te mipi mai ah hongdin ngam kei leh a kisel suangmanpha mah bang a, makai khat pawl phut kawikawi in mual hongsuak pih lodinghi.

Ki pawl na khat peuh ah a kiplo nungzui khatzong tai kawikawi in taimang suakthei hi. A omsa kipawlna khatpeuh a hoih a, zun in puah tohtoh ding hi a, ekteh bangin nusia kawikawi Makai te leh Nungzui te hangin Minam sung kitawknawi nuam mahmah hi

Minam sung a cidam keileh Minam khantoh na omlo a, Minam ki mangthang theihi. Ei minam sangin namdangte ih pimuh leh Namdangte khutsung a kitungthei dinmun a hihi. Kilem na deihna hangin namdang suakkullo hi. Namdang te dan leh kampau zuilo inzong kilem na a omthei lua hi a, Minam khat leh khat kibuaisak kineumuh lohding a thupi pen a hihi.

Upna a hizongin Ngeina a hizongin ih zahtaaksak kul a, ih kisimmawh sakding hilo hi. Minam khat leh khat kibuai na ihcih in Upna biakna, ngeina dan lehphung, omna leitang leh gamgi a kipan kisimmawh kivuak kithah na pan hong piang a hihi.

Tua a hih man in CNF/A te hongthah Zomi tampi om a, ZRAEC in Pawite a thah genloh a gam uhzong sikngeilo uhhi. Hih CNF/A te hangin Zomi mipi hongthah na bek hilo Zomgam sungah thuneihna leh ukcip nopna hangin Zomi State a kideih bek hi a, Pawi ihcih tezong Zosuan mah a hihi. Zosuan sung buaina hongbawl hong tungtuang nuamte hangin buaina hong sah semsem a hihi.

Tua a hih man in Zomi a kici zawdeuh kamphen a kullo ten ih sanggam Pawite a kisimmawh a ki mudah hi peuhmah lo a, a mau hongsimmawh in hong.mudah uh a, hongthat in, ihgam sungah a ut bangbang un a hong omciangin Zomi ten a ki hawlkhia a ki notkhia a suak a hihi. CNF/A thukhun pi etsak leng amau cihdan a mang a, a zui bang hileng Hakha pau Hakha lai ihzat kul ding a, Zomi ten ih lai ihpau te ihzat nading omlo in, ahongbei cipsak nuam cihna a hihi.

Tua a hih man in Zomi te in ihGam leh Minam adingin ihkoici ngaihsut hiam?  Mi khutnuai ah om in, a maupau a maulai zangin ih Zolai ih Zopau zanglo a, ihpau ihlai beisak zawdingmaw a hih kei leh ihpau ihlai ihgam ih minam hubit in kemcing zawding cih pen nang mimal tungah a kinga a hihi cih Zomi a kua mapeuh in ihphawk kikding deihhuai mahmah kasa hi… by. Zotang

read more news

http://www.zbc.news

#correspondent